MBUNGE KEISSY ATAHADHALISHA WANANCHI KUHUSU SHERIA MPYA YA NDOA

Mbunge wa Nkasi Kaskazini, Ali Keissy (CCM - pichani), amewataka Watanzania kuwa makini na Sheria Mpya ya Ndoa inayotarajiwa kuletwa bungeni. Mbunge huyo amesema sheria hiyo mpya inaweza ikasababisha nchi kuongozwa na Rais, wabunge na madiwani wanaojihusisha na vitendo vya mapenzi ya jinsia moja (mashoga). Keissy alitoa kauli hiyo wakati akichangia mada katika mkutano wa sita wa  Chama cha...... Wabunge cha Kupambana na Ukimwi (Tapac) uliomalizika jana mjini hapa.

Aidha, aliwaomba viongozi wa dini kukemea kwa nguvu zote vitendo hivyo.

 

Pia alipinga hatua ya wazazi kuwapeleka watoto wao wadogo kwenye shule za bweni kwa madai kuwa huko ndiko wanakojifunza vitendo hivyo.

 

“Mnashindwa kulea watoto wenu, mnawapeleka shule za bweni wakiwa na miaka mitatu ili walelewe kizungu," alisema.

 

Keissy alitolea mfano mkutano mmoja uliofanyika jijini Dar es Salaam kuwa uliwashirikisha mashoga 400, jambo alilodai ni ishara kwamba wanaojihusisha na vitendo hivyo wanaongezeka na hivyo kuitaka serikali kuwapiga marufuku.

 

 

Hata hivyo, baada ya mbunge huyo kuhitimisha mchango wake, mmoja wa vijana wanaojihusisha na ushoga, Abdillah Ally, ambaye alikuwa amealikwa na Tapac, alisema kuwa jamii inapaswa kukubali kwamba matendo hayo yanafanyika.

 

“Tunatambua kuwa sheria haziruhusu vitendo hivi, lakini vipo na vinafanyika na tunapata maambukizi kwa kiwango kikubwa. Tunachokitaka tusinyanyapaliwe na jamii bali tupewe huduma ya afya ya kujikinga na maambukizi,” alisema.

 

“Mathalani, mimi hapa nina wapenzi wanaume watatu ambao nashiriki nao mapenzi, sasa kama nimeathirika ina maana wote wale nao wamethirika,” alisema kijana huyo.

 

Akifunga mkutano huo, Naibu Waziri wa Jamii, Jinsia na Watoto, Ummy Mwalimu, aliwasihi wanasiasa wasiwabague watu wanojihusisha na vitendo vya ushoga, usagaji na matumizi ya dawa za kulevya.

 

Alisema makundi hayo yanakabiliwa na janga la maambukizi makubwa ya virusi vya Ukimwi, hivyo wanahitaji kusaidiwa ili kuondoka katika makundi hayo badala ya kuwahukumu.

 

Mwalimu alifafanua kuwa miongoni mwa washiriki wa mkutano huo alikuwa anatumia dawa za kulevya lakini baada ya kupata msaada wa kiafya, ameachana na vitendo hivyo na sasa anaendelea vizuri chini ya uangalizi.

 

Mkutano huo, uliratibiwa na Tume ya Kudhibiti Ukimwi (Tacaids), kama wadau wakuu ambapo waliotoa mada mbalimbali kuhusu jinsi wanavyopambana kupunguza maambukizi mapya ya virusi vya Ukimwi.

 

Naye Mbunge wa Chambani visiwani Zanzibar, Yusuf Salam Hussein (CUF), alisema kuwa Serikali ya Mapinduzi Zanzibar, imefanikiwa kupunguza maambukizi hayo kwa wanandoa kutokana na sheria ya kuwataka wapime Ukimwi kabla ya kufunga ndoa.

 

“Zanzibar mtu hawezi kufunga ndoa kanisani kwa padre wala msikitini kwa Sheikh ikiwa hana kibali cha Sheha ambacho kinaonesha kuwa amepima virusi vya Ukimwi,” alisema.

 

habari NA SHARON SAUWA

CHANZO: NIPASHE